Pizzera & Jaus

Original Version im Dialekt

Liaba Paul Pizzera und liaba Otto Jaus,

i mecht Eich gern vazejn, wias dazua kemma is, dass Ihr zwoa mei Leben in a weitare positive Richtung vaändat habts. Und weil i woaß, dass Ihr mi guad vastehts, schreib i in meim niederbayrischn Dialekt (mit Hang zum Oberbayrischn).

Wenn ma’s genau nimmt, hod’s 2018 o’gfangt. Des Johr war überwältigend für mi. I hob no nia sovui Höhen und Tiefn erlebt, wia in dem Johr. Und zum Schluss wuitns leider bloß no Tiefn sei. Im Endeffekt bin i bloß no oa Elend gwen, des de Symptome von extrema Liebeskummer g’habt hod, weil a Mensch ganz aus meim Leben vaschwundn is, den i eigentlich niamois mehr wieder valiern wuit. Aber de genaua Umstände dean nix zur Sach.

Es hod zum Glück ganz vui Möglichkeitn und Menschn gebn, mit deren Hilfe i mi wieder noch und noch aufrappln hob kinna. Dabei hob i mir aa des Ziel gsetzt, Dinge aus der Wejd zum schaffa, de für mi no ungeklärt gwesn san oder de mi einfach no belastn wuitn. Und so bin i gedanklich a auf mei erste große Liebe, den Torsten, kemma und in mir hod si der Wunsch aufdo, dass i den doch no amoi dreffa mechad, damid i oiss mid eam besprecha konn, wos mir von unserer Beziehung her no auf da Seele lastet. Jetz war‘s bloß a so, dass i den scho dreißg Johr nimmer gseng g‘habt hob und i a überhaupt koa Ahnung g‘habt hob, wo der überhaupt obbliem is.

Aber in da heidign Zeit muass ma echt aufbassn, wos ma si wünscht, weil des Universum reagiert inzwischn schnej. In dem Foi wars guad a so. In der folgendn Zeit is a ma nämlich dann a bor moi begegnet. Immer so wischiwaschi und im Vorbeigeh, dass i‘s fast ned glabt hob, dass er’s war. Und irgndwann hamma uns dann in da Drogerie droffa, und i hob den Muat ghabt, dass i’n oredt. Und er hod glei so nett reagiert, dass i’s auf koan Foi bereut hob. Und es hod si rausgschdeijd, dass‘ im Grunde nix zum Beredn gibt. Wos mir auf da Seele gleng is, an des hod er si gor nimma erinnert.

Wos ganz bsonders nett war an dera Begegnung: mia ham Handynummern ausdauscht, und ab dem Zeitpunkt bin i von eam schriftlich betreut worn und mei Heilung is rapide vorog’schrittn. Des war im Sommer 2019. Eam sejba is des ned bewusst, dass des für mi so wichtig war und so vui brocht hod. Mir is des aber vollkommen klar und i bin eam ewig dankbar dafür und aa seiner Frau, de des geduldet hod.

I hob von eam glernt, ja im Grunde, s’Lebn wieder zum genießn. Dass i reisn dua, dass i ma den bestn Kaffee gönn, und dass i wieder Musik hearn ko. Mei Kopf und mei Herz war’n für Musik hearn ja zu dem Zeitpunkt ganz vaschlossn gwesn, weil mi oiss an meine seelischn Qualen erinnert g’habt hod.

Aber durch eam bin i draufkemma, dass die Spotify-Idee doch gor ned so schlecht is. I suach Liada raus, de i mog und immer scho meng hob, und Spotify analysiert des und schlogt ma weitare Liada vor, de mir aa gfoin kanntn. Jetz muaß i no dazua erklärn, dass i ned vui Radio hear, und mi in da Szene überhaupt ned auskenn.

Ja, und do hod’s ned lang dauert, bis mir „Kaleidoskop“ vorgschlong worn is. Boah, i sog’s Eich, mir is fast s’Herz steh blim, so hod mi des midgrissn! Und i hob ned g‘wusst, wer des sei soid – Pizzera und Jaus. Aber dann hob i natürlich recherchiert und mir olle Liada o’gheard. Und bis auf ganz wenige Ausnahmen ham mir olle gfoin. Des gibt’s ned oft bei mir. De Musik, da Text, da Gesang, da Sprechgesang, da zwoastimmige Gesang, de Instrumente, des Zarte, des Romantische, des Kraftvolle, die Steigerung in jedm Liad, de Wuat, de Kraft, de Energien, de Rhythmen, da Dialekt, de Burschn … (wenn i fufzehn bis zwanzg Johr jünger waar, waar i des unvernünftigste Groupie vo da ganzn Wejd …)

Und so bin i über Nacht zu einem Wahnsinnsfan von Eich g’wordn, und i konn Eich gor ned sogn, wos mir des gibt, Eich zuazumhearn und natürlich a midzumsinga. In meine Träume steh i mid Eich zusammen auf der Bühne und derf bei olle Liada einfach midsinga, egal, wia si des oheard und ob i an Text genau kenn. Boah, des is ein Auspowern, des besser für die Seele ned sei kannt.

Wos mi NO so glücklich macht, is, dass i Eich für mi alloa entdeckt hob. Damid moan i, ganz unbeeinflusst von andane Leid. Weil wia oft bin i auf a Liad kemma, weil des jemandm aus meiner Umgebung gfoin hod, oder weil ses übaroind nauf und nunta spuin. Naa, Pizzera und Jaus hob i sejba entdeckt und de meistn vo meim Freundeskreis ham’s (leider) nedamoi kennt. Und i war scho Feier und Flamme!

Wenn i noch da Arbad ins Auto steig und Eia CD lafft und i sing mid Eich mid und lass mi von Eiana Power midreißn, ja wia schnej bin i wieder entspannt und hob den Arbadsalltag obbeidld! Wenn i in da Küch steh und für mei Familie koch und sing mid Eich mid und lass mi von Eiana Power midreißn, ja, wos moantsn Ihr, wia guad des Essn dann schmeckt?! Wenn i unta da Duschn steh und sing mid Eich mid und lass mi von Eiana Power midreißn, ja, wos moantsn Ihr, wia guad i danoch riach?!

Und oamoi hob i scho des Glück g’habt, dass i grod auf da Tanzflächn war, (und so oft geh i ned aus), ois ma so gnädig war, dass ma „Eich“ auflegt. Bei uns in Niederbayern. Gigantisch war des! Des beste vom Abend! (A Tanzfläche is des, wos‘ früher in Lokalitätn gebn hod, wo ganz vui Menschn auf oamoi und dicht anananda hi geh ham derfa weils dann alloa oder zu zwoat auf de Musik, de aufglegt oder live gspuit worn is, danzd ham.)

Natürlich war i mid meim Mo scho auf am Konzert. Do samma extra noch Oberösterreich nüber gfohn, mid Übernachtung. I wuit ned wartn, bis Ihr noch Minga kemmts. Und wenn i momentan drodeng, dass i ENDLICH wieder auf a Konzert von Eich mecht, kemman ma de Tränen vor Traurigkeit. Und wenn i drodeng, wos de momentane Situation vielleicht für Eich bedeidt, dann aa.

I sog eiso von ganzm Herzn DANKE! I bin dem Schicksal so dankbar, dass Ihr zwoa Eich droffa habt’s und i bin Eich zwoa so dankbar, dass Ihr Eich zamdo habt’s. Und i mecht Eich ned unter Druck setzn, indem i schreib, macht’s bitte weida so, weil des is zwar mei inniger Wunsch, aber i wünsch ma genauso für Eich, dass des, wos Ihr machts, aa immer für Eich sejba bassd. Dass Ihr in Eiana Berufung bleibt’s und aa den Muat habt’s, wos zum vaändan, wenn Eia Herz Eich des sogt. Aber i hoff, a Vaänderung kimmt ned so boid.

Und dann wünsch i Eich no a scheens Lebn. Dass des so is, wia’z Ihr Eich des vorstejds und wünschts, und dass Ihr immer de richtign Leid und Freind um Eich habt’s, de Eich auffangan, wenn amoi wos ausm Ruada grodn dad.

DANKE dafür, wos Ihr da südöstlichn Dialektgruppn im deitschn Sprachraum gebt’s! (Hob i grod googlt.)

DANKE dafür, wos Ihr MIR gebt’s!

Eia gräßta Fan, d‘Moni

PS: Spui ma moi gegaranand Quizduell?